2009-01-11 Kapistahan ng Pagbinyag ng Panginoón

Unang Pagbasa Isaias 42:1-4.6-7

Pagpapahayag mula sa Aklat ni Propeta Isaias
Sinabi ng Panginoón, “Ito ang lingkod ko na aking itataas, na aking pinili at kinalulugdan; ibubuhos ko sa kaniyá ang aking Espiritu, at sa mga bansa ay siya ang magpapairal ng katarungan. Mahinahon at banayad kung siya’y magsalita, ni hindi magtataas ng kaniyáng tinig.
Ang marupok na tambo’y hindi babaliin, ilaw na aandap-andap di n’ya papatayin, at ang katarungan ang paiiralin. Di siya mawawalan ng pag-asa ni masisiraan ng loob. Paghahariin niya ang katarungan sa daigdig. Ang mga bansa sa malayo ay buong pananabik na maghihintay sa kaniyáng mga turo.
Akong Panginoón, tumawag sa iyo, binigyan kita ng kapangyarihan upang pairalin ang katarungan sa daigdig. Sa pamamagitan mo ay gagawa ako ng pakikipagtipan sa lahat ng tao at magdadala ng liwanag sa lahat ng bansa. Ikaw ang magpapadilat sa mga bulag at magpapalaya sa mga bilanggo ng kadiliman.”
Ang Salita ng Diyos!
Magandáng Balità Biblia © 1980 Philippine Bible Society.

Ikalawang Pagbasa Gawa 10:34-38

Pagpapahayag mula sa mga Gawa ng mga Apostol
Noong mga araw na iyon, nagsalita si Pedro, “Ngayon ko lubusang natanto na walang itinatangi ang Diyos. Nalulugod siya sa sinumang may takot sa kaniyá at gumagawa ng matuwid, kahit saang bansa. Ibinigay ng Diyos ang kaniyáng salita sa mga Israelita. Sa kanila niya ipinahayag ang Mabuting Balita tungkol sa pakikipagkasundo sa pamamagitan ni Hesukristo. Nguni’t siya’y Panginoón ng lahat!
Alam ninyo ang nangyari sa buong Judea na nagsimula sa Galilea nang mangaral si Juan tungkol sa binyag. Ang sinasabi ko’y tungkol kay Hesus na taga-Nazaret. Ipinagkaloob sa kaniyá ng Diyos ang Espiritu Santo at ang kapangyarihan bilang katunayan na siya nga ang Hinirang. Sapagka’t sumasakaniyá ang Diyos, saanman siya pumaroon ay gumagawa siya ng kabutihan at nagpapagaling sa lahat ng pinahihirapan ng diyablo.”
Ang Salita ng Diyos!
Magandáng Balità Biblia © 1980 Philippine Bible Society.

Mabuting Balita Marcos 1:7-11

Ang Mabuting Balita ng Panginoón ayon kay San Marcos
Noong panahong iyon: Sinasabi ni Juan Bautista sa kaniyáng pangangaral: “Darating na kasunod ko ang isang makapangyarihan kaysa akin: ni hindi ako karapat-dapat magkalag ng tali ng kaniyáng mga panyapak. Binibinyagan ko kayo sa tubig, nguni’t bibinyagan niya kayo sa Espiritu Santo.”
Hindi nagluwat, dumating si Hesus mula sa Nazaret, Galilea, at siya’y bininyagan ni Juan sa Ilog Jordan. Pagkaahung-pagkaahon ni Hesus sa tubig ay nakita niyang nabuksan ang kalangitan, at bumababa sa kaniyá ang Espiritu na gaya ng isang kalapati. At isang tinig ang nagmula sa langit: “Ikaw ang minamahal kong Anak, lubos kitang kinalulugdan.”
Ang Mabuting Balita ng Panginoón!
Magandáng Balità Biblia © 1980 Philippine Bible Society.

Mga yamang pangliturhiyáng Filipino

Misa Banál na Espíritú Misa "Banál na Espíritú"
Si Yahweh ang Aking Pastol "Si Yahweh ang Aking Pastól"

Pamplano ng Liturhiyá (Word .doc)

 
© 2008 Magsimba Press. All rights reserved. Write to us at info@magsimba.com.