Misa, Liturhiya, Pagbasa, Awit sa
UwianUgnayYamanSinugboanonIlocanoCapampanganPangasinan

June 24: Pagsilang ni San Juan Bautista: Araw, 06/24/2018

Leksyonaryo 587

Mga Awit Mga Awit sa Kapistahang Itó

Mga Pagbasa

Pagbasa 1: Propeta Isaias 49:1-6

Pagpapahayag mula sa Aklat ni Propeta Isaias

Makinig kayó mga taong naninirahan sa malalayong lugar.
Pinili na akó ng Panginoón bago pa isiláng at hinirang niyá akó para siyá’y paglingkuran.
Mga salita ko’y ginawa niyáng sintalas ng tabak,
siyá ang sa aki’y laging nag-iingat.
Ginawa niyá akóng parang matulis na palaso
na anumang oras ay handang itudla.
Sinabi niyá sa akin,
“Israel,
ikaw ay lingkod ko,
sa pamamagitan mo akó’y dadakilain ng mga tao."
Ngunit ang tugon ko,
“Akó ay nabigo sa aking pagsisikap,
hindi nagtagumpay gayong ibinuhos ko ang aking lakas."
Gayunman’y itinitiwala ko sa Panginoón ang aking kalagayan,
na akó’y gagantimpalaan sa aking nakayanan.
Bago pa akó ipanganak ay hinirang na ng Panginoón,
pinili niyá akó para maging lingkod niyá
upang tipunin ang nangalat na mga Israelita,
at silá’y ibalik sa bayang Israel.
Binigyan akó ng Panginoón ng karangalan,
sa kaniyá nagbubuhat ang aking karangalan.
Sinabi ng Panginoón sa akin:
“Israel na aking lingkod,
may mas mahalaga pa akóng ipagagawa sa iyo.
Bukod sa pagpapanumbalik sa mga Israelitang nalabi
ay gagawin kitang tanglaw ng mga bansa
upang lahát sa daigdig ay maligtas."


2181

Tugon sa Salmo: Awit 0139

Mas malaki at malinaw na larawan:
587-Pinupuri-kita

Pinupuri kita, D’yos ko, dahil ako’y nilikha mo!
2182

Salmong Tugunan: Awit 0139

Ako’y iyong siniyasat, batid mo ang aking buhay,
ang lahat kong lihim, Poon, ay tiyak mong nalalaman.
Ang lahat ng gawain ko, sa iyo ay hindi lingid,
kahit ikaw ay malayo, batid mo ang aking isip.
Ako’y iyong nakikita, gumagawa o hindi man,
ang lahat ng gawain ko’y pawang iyong nalalaman.

Ang anumang aking sangkap, Ikaw O Diyos ang lumikha,
sa tiyan ng aking ina’y hinugis mo akong bata.
Pinupuri kita, O Diyos, marapat kang katakutan,
ang lahat ng gawain mo ay kahangahangang tunay.

Lahat ito’y nakikintal, sa puso ko at loobin.
Ang buto ko sa katawan noong iyon ay hugisin,
sa loob ng bahay-bata doo’y iyong napapansin;
lumalaki ako roong sa iyo’y di nalilihim.


2183

Pagbasa 2: Gawâ ng mga Apostol 13:22-26

Pagpapahayag mula sa Gawa ng mga Apostol

Noong mga araw na iyon,
sinabi ni Pablo,
“Nang si Saulo’y alisin ng Diyós,
inihalili si David
upang maghari sa ating mga ninuno.
At ganito ang patotoo ng Diyós tungkol sa kaniyá,
‘Natagpuan ko kay David na anak ni Jesse
ang lalaking nakalulugod sa akin,
isang lalaking handang tumupad sa lahát ng iniuutos ko.’
Mula sa angkan ng lalaking ito ipinagkaloob sa Israel si Hesús,
ang kaniyáng ipinangakóng Tagapagligtas.
Bago siyá dumating,
ipinangaral ni Juan sa buong Israel
na dapat nilang pagsisiha’t talikdan ang kanilang mga kasalanan,
at pabinyag.
Nang matapos na ni Juan ang kaniyáng gawain,
sinabi niyá sa mga tao,
‘Sino ba akó sa akala ninyó?
Hindi akó ang Kristo.
Ngunit siyá’y darating na kasunod ko.
At hindi akó karapat-dapat kahit tagaalis ng panyapak.’
Mga kapatid kong mula sa lahi ni Abraham,
at mga taong may takót sa Diyós:
tayo ang pinadalhan ng balitang ito tungkol sa kaligtasan."


2184

Pambungad: ...

Ikaw, Juan, ay propeta, sinugo upang manguna sa Manunubos ng sala.
2185

Magandang Balita: Mabuting Balita ayon kay San Lucas 1:57-66, 80

Ang Mabuting Balita ng Panginoón ayon kay San Lucas

Dumating ang oras ng panganganak ni Elisabet,
at nagluwal siyá ng isang sanggol na lalaki.
Nabalitaan ng kaniyáng mga kapitbahay at mga kamag-anak
na siyá’y pinagpala ng Panginoón,
at nakigalak silá sa kaniyá.

Nang ikawalong araw,
dumalo silá sa pagtutuli ng sanggol.
Zacarias sana ang ipangangalan sa kaniyá
– gaya ng kaniyáng ama –
ngunit sinabi ng kaniyáng ina,
“Hindi!
Juan ang ipapangalan sa kaniyá."
“Subalit wala isa man sa iyong mga kamag-anak ang may ganyang pangalan,”
wika nila.
Kaya’t hinudyatan nila ang kaniyáng ama at itinanong
kung ano ang ibig niyáng itawag sa sanggol.
Humingi siyá ng masusulatan at sumulat ng ganito:
“Juan ang kaniyáng pangalan."
At namangha siláng lahát.
Pagdaka’y nakapagsalita siyá,
at nagpuri sa Diyós.
Natakót ang lahát ng kanilang kapitbahay,
anupat naging usap-usapan sa buong kaburulan ng Judea ang mga bagay na ito.

Pinakaisip-isip ito ng lahát ng nakaalam at ang kanilang tanong:
“Magiging ano kaya ang batang ito?"
Sapagkat maliwanag na sumasakaniyá ang Panginoón.

Lumaki ang bata at naging malakas ang kaniyáng espiritu.
Siyá’y tumira sa ilang hanggang sa araw na magpakilala siyá sa Israel.


2186

Magandáng Balitŕ Biblia © 1980 Philippine Bible Society. All rights reserved.
UwianUgnayYamanSinugboanonIlocanoCapampanganPangasinan

Welcome.
Magsimba. Litúrhiya. Filipino. www.magsimba.com Filipino Catholic Liturgical Resources Since 2006

Please pray for our work and make a donation. Please help. Salamat po.



Ang Aming Pakay: Mga yaman ng Litúrhiyang Tagalog | Litúrhiyang Filipino sa paghahandâ ng lingguhang pagdiriwang sa Misang Tagalog | Misang Filipino, sa Eukaristiya, ng pagliligtás ni Hesús sa atin: mga awit, salmong Tagalog, salmong Filipino, pagbasa sa Filipino | Tagalog.

Our mission: Filipino liturgy | Tagalog liturgy resources for preparing for the Tagalog Mass | Filipino Mass, the weekly celebration in the Eucharist of our redemption by Jesus: Tagalog hymns, Tagalog songs, Tagalog psalms, Tagalog readings, Filipino hymns, Filipino songs, Filipino psalms, Filipino readings, Pilipino hymns, Pilipino songs, Pilipino psalms, Pilipino readings for the Tagalog Eucharist, Filipino Eucharist.
Karapatáng-sipì © 2006-2022 Magsimba Press. Vic Romero, Editor. Nakabukód lahát ang karapatán. All rights reserved. Since 2006-08-04. Write to us at right arrow info@magsimba.com. Dumadalaw kayó mulâ sa IP 44.200.40.97