Awit | Salmo Animnapút-Tatló (63): Paghahangád sa Diyós

Pakinggan

1. O D’yós, ikáw ang aking D’yós na lagi kong hinahanap,
Ang uháw kong kaluluwa’y tanging ikáw yaóng hangád,
Para akóng tuyong lupà na tubig ang siyáng lunas,
Para akóng tuyong lupà na tubig ang siyáng lunas.

2. Bayaan mong sa santwaryo, sa lugár ng dakong banál,
Ikáw roo’y mamasdán ko, sa likás mong karangalan.
Ang wagás na pag-ibig mo’y higit pa kaysa buhay,
Kayâ akó magpupuri’t ikáw ang pag-uukulan.

3. Habang akó’y nabubuhay, akó’y magpapasalamat,
At akó ay dadalangin na kamáy ko’y nakataás.
Itóng aking kaluluwa’y kakaing may kasiyahan,
Magagalák na umawit ng papuring iaalay.

4. Lamán ka ng gunitâ ko samantalang nahihimláy,
Magdamág na ang palaging iniisip ko ay ikáw,
Pagkát ikáw sa tuwina ang katulong na malapit,
Sa lilim ng iyóng pakpák galák akóng umaawit.

Coda: Itóng aking kaluluwa’y sa ‘yo lang nanghahawak,
Pagkát akó, kung hawak mo, kaligtasa’y natitiyák.

Magandáng Balità Biblia © 1980 Philippine Bible Society.

---